Bakı yenidən sənətin nəfəsi ilə yaşayırdı… Bu il keçirilən Bakı Beynəlxalq Film Festivalı ölkənin kino ictimaiyyətini və sənətsevərləri bir araya gətirdi. Festivalın ən xüsusi proqramlarından olan “Zəfər Filmləri” bölməsi isə həm mövzu, həm ruh, həm də bədii dəyər baxımından ən çox müzakirə edilən hissəyə çevrildi.

Məhz bu bölmədə təqdim olunan “Allaha salam” filmi həm məzmun dərinliyi, həm də vizual poetikası ilə diqqətin mərkəzində dayandı və festivalın ən çox alqışlanan ekran işlərindən biri oldu.


Filmin ruhu – insanın Yaradanla səssiz dialoqu

“Allaha salam” filmi göstərildiyi ilk andan tamaşaçıları tam mənası ilə öz sehrinə aldı. Kadrlar sadəcə görüntü deyil, sanki bir dua, bir iç səslənmə kimi axırdı. Film insanın həyat, varlıq, iman və mənəvi qayıdış sualları ilə üz-üzə qaldığı məqamları poetik üslubda təqdim edir.

Rejissorun yanaşması, aktyor oyununun təbiiliyi, musiqinin ahəngi elə bir harmoniya yaradırdı ki, zalda oturan hər kəs öz içindəki sualları yenidən eşitdi. Bu ekran işi bədii dəyərləri ilə yanaşı, mənəvi yükü ilə də seçilərək festivalın ən təsirli nümunələrindən biri oldu.

Filmin yaradıcı heyəti – sənətə sədaqətin imzası

“Allaha salam” filminin bu qədər güclü təsir bağışlamasında onun arxasında dayanan peşəkar komandanın xüsusi rolu var. Ekran əsərinin yaradıcı heyəti belədir:

Ssenari və rejissor: Xəyal Rza

Operator: Məmmədəmin Əlizadə

Montaj: Ülvi Babayev

Texniki məsləhətçi: Rafiq Əliyev

Səs rejissoru: Əlibaba

Bəstəkar: Cövhər Həsənzadə

İşıq üzrə mütəxəssis: Tahir Əliyev

Rejissor assistenti: Vasif Qurbanzadə

Storyboard müəllifi: Vüqar Qurbanov

Dizayner: Orxan Musayev

Fotoqraf: M.M.

Operator assistenti: Orxan Məmmədov

Prodüser: Xəyal Rzazadə

Bədii rəhbər:
Oktay Mir-Qasım


Bu komanda həm texniki, həm bədii, həm də mənəvi yanaşması ilə filmin ruhunu ən yüksək səviyyədə qurmağa nail olub.

Festival izləyicilərinin reaksiyası

Təqdimat zamanı zalda bəzən sükutun, bəzən isə duyğusal kədərin hiss olunduğu anlar oldu. Tamaşaçılar filmin dərin mənasına, vizual estetik güzəştə getməyən yanaşmasına və yaşatdığı mənəvi ovqata səmimi şəkildə reaksiya verdilər.

Filmin sonunda səslənən alqışlar uzun müddət davam etdi. Bəzi izləyicilər bunu festivalın ən güclü və təsiredici təqdimatı adlandırdı.


Dua kimi film, salam kimi sənət…

“Allaha salam” filmi bir daha sübut etdi ki, Azərbaycan kinosu yalnız tarixi mövzularla deyil, həm də ruhani və fəlsəfi dəyər daşıyan ekran əsərləri ilə öz sözünü deməyə qadirdir. Bu film həm sənət baxımından yetkin, həm də mənəvi baxımdan zəngin bir nümunə olaraq festival tarixində xüsusi bir iz qoydu.




Milli Mənəviyyat müstəqil beynəlxalq qəzetinin
Baş redaktoru :
Vəli Əliyev