Həyatda insanın çox tanışı, çox həmsöhbəti ola bilər. Amma hər salam verənə dost, hər gülən üzə səmimi insan demək olmaz. Çünki dostluq sözlə deyil, münasibətlə, sədaqətlə və çətin gündə göstərilən davranışla ölçülür.

Elə insan var ki, sevincinə şərik olar, amma uğuruna dözməz. Üzünə tərif deyər, arxanca danışar. Ehtiyacın olanda yanında görünməz, işi düşəndə isə səni ən yaxın adamı hesab edər.

Əsl dost isə sənin yoxluğunda da adını qoruyar, səhvini görəndə üzünə deyər, uğuruna paxıllıq etməz. Sənə yaltaqlanmaz, səni aldatmaz, öz mənfəəti naminə etibarından istifadə etməz. Çətinliyə düşəndə bəhanə axtarmaz, əlindən gələn köməyi əsirgəməz.

Dost seçərkən insanın var-dövlətinə, vəzifəsinə, danışığına deyil, xarakterinə, vicdanına və əməlinə baxmaq lazımdır. Çünki bəzi insanlar süfrəndə oturar, amma ürəyində sənə yer verməz. Bəziləri isə uzaqda olar, amma səni heç vaxt tək qoymaz.

Unutmayaq ki, dostluq kor-koranə etibar etmək deyil. Dostluq həm də insanı tanımaq, sərhədləri qorumaq və qarşılıqlı hörmətə sahib olmaqdır.

Bəs kimə dost deyəsən? Sənin uğuruna sevinənə, səhvini düzəltməyə çalışanına, sirrini qoruyana, çətin gündə üz döndərməyənə və səni öz mənfəətindən aşağı tutmayana!

Çünki həyatda dostların sayının çoxluğu deyil, onların səmimiyyəti insanın zənginliyidir. Bəzən bir həqiqi dost yüz saxta dostdan qiymətlidir.

Dostunu ağılla seç, ürəklə sev, amma etibarını zamanla qazanmasına imkan ver.

Vəli Əliyev

Milli Mənəviyyat
müstəqil, beynəlxalq qəzetin
Baş redaktoru