✍️Vəli Əliyev yazır... ETİBARDAN QİYMƏTLİ HEÇ NƏ YOXDUR HƏYATDA!
İnsan həyatda çox şey qazana bilər: pul, var-dövlət, şöhrət, vəzifə, hörmət... Amma bütün bunların içərisində elə bir dəyər var ki, onu nə pulla almaq, nə də itirdikdən sonra asanlıqla geri qaytarmaq mümkündür. Bu, etibardır!
Etibar insanın qazandığı ən böyük mənəvi sərvətdir. Bir insan sənə inanırsa, deməli, sənə öz rahatlığını, sirrini, bəzən də taleyinin bir parçasını etibar edir. Bu inamı qorumaq isə böyük məsuliyyətdir.
Unutmayaq ki, etibar bir gündə yaranmır. Onu zaman, səmimiyyət, dürüstlük və davranış formalaşdırır. Amma bir yalan, bir xəyanət, bir fürsətçilik illərlə qurulan inamı bir anda məhv edə bilər.
İnsanları sözlərinə görə deyil, davranışlarına görə tanımaq lazımdır. Çünki hər gözəl danışan səmimi, hər gülümsəyən dost, hər əl uzadan etibarlı deyil.
Həyatda elə yaşa ki, insanlar sənin yanında olmadığın zaman da sənə inansınlar. Çünki əsl etibar insanın üzünə deyil, yoxluğunda da qorunan dəyərdir.
Varlı olmaq yaxşıdır, hörmət qazanmaq gözəldir, sevilmək xoşbəxtlikdir. Amma etibarlı insan kimi tanınmaq bütün bunlardan daha böyük şərəfdir.
Etibarını qoru! Çünki insan hər şeyini itirib yenidən qazana bilər, amma itirilmiş etibarı geri qaytarmaq həmişə mümkün olmur.
Vəli Əliyev
Milli Mənəviyyat müstəqil, beynəlxalq qəzetin
Baş redaktoru
