Nə əvvələm, nə indiyəm,
Səksəkənin içindəyəm.
Axırıncı keçiddəyəm -
Keçidimi keçim gedim.

O bulaqdan çox içmişəm,
Bu çeşmədən içim gedim.
Bir sot biçin yerim qalıb,
Bu yeri də biçim gedim.

Yarpaq-yarpaq tökülmüşəm,
Sarmaşığa bükülmüşəm,
Kərpic-kərpic sökülmüşəm,
Pəncərədən baxım gedim.
O qapıdan girmiş idim,
Bu qapıdan çıxım gedim.

Aləm bütün qalmaqaldı,
Kimlər getdi, kimlər qaldı.
Dünya evi darısqaldı,
Daha mən də durum gedim.
Günahımı, savabımı,
Qoltuğuma vurum gedim...

MusaYaqub