Azərbaycan xalqı dünyanın ən qədim və zəngin sivilizasiyalarından birinin varisidir. Minilliklərin sınağından keçmiş milli–mənəvi dəyərlərimiz xalqımızın kimliyini, birliyini və varlığını qoruyan canlı yaddaşdır. Bu dəyərlər həm tarixi köklərimizdən qidalanır, həm də bu günün çağırışları ilə ayaqlaşaraq gələcək nəsillərə ötürülür.
Vətən sevgisi — xalqımızın ruhu və milli kimliyimizin əsası
Azərbaycan xalqı üçün Vətən anlayışı təkcə coğrafi məfhum deyil, müqəddəs dəyər, bir könül borcudur. Tarixin bütün dövrlərində xalqımız torpağını göz bəbəyi kimi qoruyub, istiqlal uğrunda döyüşlərdən şərəflə çıxıb.
Min illər boyunca formalaşan dövlətçilik ənənələri bu gün müstəqil Azərbaycan Respublikasının ideoloji dayağıdır.
Ulu Öndər Heydər Əliyevin siyasi irsi və yaratdığı Azərbaycançılıq ideologiyası milli dəyərlərimizin qorunmasına, müasir dünyaya inteqrasiya olunmasına möhkəm zəmin yaratdı. Prezident İlham Əliyevin uğurlu siyasəti bu dəyəri daha da inkişaf etdirərək ölkəmizin beynəlxalq nüfuzunu yüksəldir.
Ana dili – milli varlığımızın bünövrəsi
Azərbaycan dili xalqımızın ruhudur, varlığıdır, özüdür.
Dədə Qorqudun hikmətləri, Nizaminin fəlsəfəsi, Füzulinin eşqi, Xaqaninin qüdrəti, Sabirin satirası – hamısı bu dilin fövqəladə zənginliyini təsdiqləyir.
Müstəqil Azərbaycanın dövlət dili kimi Azərbaycan dili bu gün həm elmi, həm mədəni, həm də ictimai həyatın aparıcı təməlidir.
Ailə — milli-mənəvi dəyərlərin beşiyi
Azərbaycan xalqında ailə müqəddəsdir.
Valideynə hörmət, böyüyə ehtiram, kiçiyə mərhəmət kimi dəyərlər əsrlər boyu cəmiyyət həyatının əsas qaydalarından olub.
Bu gün ölkəmizdə ailə institutunun möhkəmləndirilməsi üçün dövlət səviyyəsində ardıcıl siyasət həyata keçirilir ki, bu da milli-mənəvi köklərimizin yaşamasında mühüm rol oynayır.
Qonaqpərvərlik — xalqımızın siması
Azərbaycan xalqı dünyada qonaqpərvərliyi ilə seçilir.
“Qonaq evin bəzəyidir”, “Qonaq ruzisi ilə gələr” kimi deyimlər xalqın insan sevgisinin, geniş ürəyinin göstəricisidir. Bu ənənə həm ailə həyatında, həm də beynəlxalq münasibətlərdə ölkəmizin müsbət imicini formalaşdıran mühüm dəyərdir.
Milli mədəniyyət və folklor xəzinəmiz
Xalqımızın mənəvi dəyərləri ən parlaq şəkildə folklorumuzda, musiqimizdə və mədəni irsimizdə təcəssüm edir.
Muğam,
Aşıq sənəti,
Xalçaçılıq,
Dədə Qorqud dastanı,
Novruz bayramı,
Koroğlu eposu,
Azərbaycan xalqının bənzərsiz mədəni kimliyini yaradan ən böyük sərvətlərdir. Bu irsin böyük hissəsi UNESCO tərəfindən dünya irsi kimi tanınıb.
İslam dəyərləri və multikulturalizm ənənəsi
Azərbaycan əsrlər boyunca İslam mədəniyyətinin mühüm mərkəzlərindən biri olmaqla yanaşı, digər din və mədəniyyətlərə də açıq, tolerant toplum kimi formalaşıb.
Müxtəlif dinlərin sülh və qarşılıqlı hörmət şəraitində yaşamaması Azərbaycanın dünyaya təqdim etdiyi unikal modeldir.
Ulu Öndər Heydər Əliyevin əsasını qoyduğu, Prezident İlham Əliyevin və Birinci vitse-prezident Mehriban Əliyevanın ardıcıl şəkildə inkişaf etdirdiyi multikulturalizm siyasəti bu gün ölkəmizin beynəlxalq nüfuzunu daha da gücləndirir.
Ədalət, mərdlik və vətənpərvərlik – xalq ruhunun sarsılmaz sütunları
Qəhrəmanlıq, namus, şərəf, sözə sədaqət kimi dəyərlər Azərbaycan xalqının xarakterini formalaşdıran əsas xüsusiyyətlərdir.
Tariximizin bütün dövrlərində xalqımız ədalətsizliyə qarşı dayanmış, haqqı müdafiə etmişdir.
Bu mənəvi gücün ən parlaq təcəssümü qalib Azərbaycan Ordusunun 44 günlük Vətən müharibəsində qazandığı tarixi Zəfərdir. Bu Zəfər xalqımızın milli birliyinin, mənəvi dəyərlərinin və əzminin sarsılmazlığının təsdiqidir.
Maarifçilik və mədəni yüksəliş – gələcəyə aparan yol
Azərbaycan maarifçilik hərəkatı M.F. Axundzadə, Həsən bəy Zərdabi, Mirzə Cəlil, Üzeyir Hacıbəyli kimi dahilərin fəaliyyəti ilə inkişaf edərək milli düşüncə tərzimizin formalaşmasına böyük təsir göstərib.
Bu gün dövlətin elmə, təhsilə, gəncliyin inkişafına göstərdiyi diqqət milli-mənəvi dəyərlərimizin müasir dövrə uyğun şəkildə yaşamasını təmin edir.

Azərbaycan xalqının milli-mənəvi dəyərləri bizim milli kimliyimizin, dövlət müstəqilliyimizin və gələcəyimizin ən güclü təminatıdır. Bu dəyərlərin qorunması, təbliği və gələcək nəsillərə ötürülməsi hər bir vətəndaşın müqəddəs borcudur.
Xalqımız bu dəyərləri yaşatdıqca, Azərbaycan daha da güclənəcək, inkişaf edəcək və dünyada öz mövqelərini möhkəmləndirəcəkdir.
Vəli Əliyev
“Milli Mənəviyyat” müstəqil, beynəlxalq qəzetinin Baş redaktoru