Azərbaycan xalqının taleyində mühüm yer tutan 15 İyun – Milli Qurtuluş Günü dövlətçilik tariximizin ən əlamətdar səhifələrindən biridir. Bu tarix təkcə siyasi hadisə deyil, həm də müstəqilliyini yenicə bərpa etmiş Azərbaycanın parçalanmaq və dövlətçiliyini itirmək təhlükəsindən xilas olduğu gün kimi yaddaşlara həkk olunmuşdur.

1993-cü ilin iyun ayında ölkədə hökm sürən siyasi böhran, hakimiyyət uğrunda mübarizə, iqtisadi tənəzzül və vətəndaş qarşıdurması təhlükəsi Azərbaycanı ağır sınaqlarla üz-üzə qoymuşdu. Belə bir mürəkkəb və taleyüklü dövrdə xalqın təkidli tələbi ilə ümummilli lider Heydər Əliyev yenidən siyasi hakimiyyətə qayıtdı. 1993-cü il iyunun 15-də Heydər Əliyevin Azərbaycan Ali Sovetinin sədri seçilməsi ölkədə sabitliyin və dövlət quruculuğunun əsasını qoydu.

Məhz bu tarixi qərardan sonra Azərbaycanda vətəndaş müharibəsi təhlükəsinin qarşısı alındı, dövlət institutları möhkəmləndirildi, qanunçuluq bərpa edildi və xalqın gələcəyə inamı yenidən formalaşdı. Heydər Əliyevin uzaqgörən siyasəti nəticəsində Azərbaycan müstəqil dövlət kimi inkişaf yoluna qədəm qoydu, beynəlxalq aləmdə öz layiqli yerini tutmağa başladı.

Milli Qurtuluş Günü ilk dəfə 1997-ci ildə bayram kimi qeyd olunmağa başlanmış, 1998-ci ildən isə rəsmi dövlət bayramı statusu almışdır. Hər il iyunun 15-də ölkəmizin hər yerində müxtəlif tədbirlər, konfranslar, mədəni proqramlar və konsertlər keçirilir, xalqımız dövlətçiliyimizin xilası naminə görülən xidmətləri ehtiramla yad edir.

Bu gün artıq Azərbaycan qüdrətli, sabit və inkişaf edən bir dövlətdir. 15 İyun tarixində əsası qoyulan siyasi sabitlik sonrakı illərdə ölkənin sosial-iqtisadi yüksəlişinə, ordumuzun güclənməsinə və nəhayət, tarixi Zəfərimizin qazanılmasına möhkəm zəmin yaratmışdır.

Milli Qurtuluş Günü Azərbaycan xalqının birlik, həmrəylik və dövlətçilik iradəsinin təntənəsidir. Bu əlamətdar gün hər bir vətəndaşa xatırladır ki, müstəqilliyin qorunması, dövlətçiliyin möhkəmləndirilməsi və milli birliyin təmin olunması daim ən ali vəzifələrimizdən biridir.

15 İyun – Milli Qurtuluş Günümüz mübarək!

Vəli Əliyev
Baş redaktor