Müasir dövrdə təhsilin ən mühüm istiqamətlərindən biri inklüziv təhsildir. Cəmiyyətin hər bir üzvünün bərabər imkanlara malik olması, xüsusi qayğıya ehtiyacı olan uşaqların təhsil və sosial həyata tam inteqrasiyası yalnız dövlət siyasəti deyil, həm də yüksək peşəkarlıq və humanist yanaşma tələb edən mühüm missiyadır. Azərbaycanda bu sahədə uğurlu fəaliyyəti ilə seçilən mütəxəssislərdən biri də Arif Quliyevdir.

Arif Quliyev inklüziv təhsili sadəcə peşə fəaliyyəti kimi deyil, cəmiyyətin gələcəyini formalaşdıran mühüm sosial məsuliyyət kimi qəbul edir. Gənc yaşına baxmayaraq, innovativ yanaşmaları, beynəlxalq təcrübəsi və uğurlu idarəçilik bacarığı ilə inklüziv təhsil sahəsində nüfuz qazanmış mütəxəssislər sırasındadır.

Onun müəllifi və rəhbəri olduğu təhsil proqramlarında uşaqların yalnız akademik bilikləri deyil, sosial bacarıqları, emosional inkişafı və fiziki potensialı da kompleks şəkildə inkişaf etdirilir. Bu yanaşma hər bir uşağın fərdi xüsusiyyətlərini nəzərə alaraq onların cəmiyyətə tam inteqrasiyasını hədəfləyir.

Arif müəllimin fəaliyyətində xüsusi yer tutan yeniliklərdən biri Tətbiqi Davranış Analizi (ABA) metodunun terapevtik idman proqramları ilə uzlaşdırılmasıdır. Fiziki terapiya və idmanın reabilitasiya imkanlarını müasir pedaqoji metodlarla birləşdirən bu model uşaqların inkişafında mühüm nəticələr verib və inklüziv təhsil sahəsində yeni yanaşma formalaşdırıb.

Bu uğurlar təsadüfi deyil. Arif Quliyev inklüziv təhsil, xüsusi pedaqogika və loqopediya istiqamətində beynəlxalq səviyyəli təlimlərdə iştirak edib, müasir elmi metodologiyaları mənimsəyərək onları ölkəmizin təhsil sisteminə uğurla tətbiq edir. O, yalnız öz peşəkar inkişafı ilə kifayətlənmir, eyni zamanda gənc mütəxəssislərin hazırlanmasına, onların peşəkar bacarıqlarının artırılmasına da xüsusi önəm verir.

Arif Quliyevin rəhbərlik fəlsəfəsinin əsasını bir prinsip təşkil edir: inklüziv təhsil alan hər bir uşaq gələcəkdə müstəqil, cəmiyyətə faydalı və öz ayaqları üzərində dayana bilən şəxsiyyət kimi formalaşmalıdır. O, hər bir uşağa fərqli potensiala malik bir istedad kimi yanaşır və həmin potensialın üzə çıxarılması üçün bütün imkanlardan istifadə edir.

Bu yanaşmanın nəticələri artıq özünü göstərməkdədir. Onun hazırladığı proqramlar vasitəsilə xüsusi qayğıya ehtiyacı olan uşaqlar arasında peşəkar futbolçular, yüngül atletlər, şahmatçılar, riyaziyyat sahəsində yüksək nəticələr göstərən gənclər yetişməkdədir. Bu uğurlar göstərir ki, düzgün metodologiya, peşəkar yanaşma və səmimi qayğı istənilən maneəni aradan qaldıra bilər.

Arif müəllimin rəhbərlik etdiyi proqramlar nəticəsində onlarla uşaq qısa müddətdə əhəmiyyətli inkişaf yolu keçərək təhsil və ictimai həyata uğurla inteqrasiya olunub. Bu nailiyyətlər valideynlərin etimadını qazanmaqla yanaşı, peşəkar mütəxəssis ictimaiyyəti tərəfindən də yüksək qiymətləndirilir.

Bu gün Arif Quliyev təkcə inklüziv təhsil proqramlarının rəhbəri deyil, həm də yeni layihələrin, təhsil mərkəzlərinin və filialların inkişaf strategiyasını müəyyənləşdirən peşəkar idarəçidir. Onun şəffaf idarəçilik prinsipləri, komanda quruculuğu bacarığı və yenilikçi baxışları inklüziv təhsilin gələcəyinə mühüm töhfə verir.

İnklüziv təhsil yalnız təhsil vermək deyil, hər bir uşağın daxilində gizlənən potensialı üzə çıxarmaq, ona cəmiyyətdə layiqli yer qazandırmaqdır. Arif Quliyevin fəaliyyəti də məhz bu ali məqsədə xidmət edir. Onun həyata keçirdiyi layihələr və qazandığı uğurlar Azərbaycanın inklüziv təhsil sisteminin inkişafında mühüm mərhələ təşkil edir və gələcək nəsillər üçün dəyərli nümunədir.

Vəli Əliyev
Milli Mənəviyyat qəzetinin
Baş redaktoru