İnsan həyatda çox şey itirə bilər. Pulunu, vəzifəsini, imkanlarını, hətta illərlə qurduğu sərvətini də itirə bilər. Lakin bütün bunları yenidən qazanmaq mümkündür. Elə bir dəyər var ki, onu itirəndən sonra geri qaytarmaq olduqca çətin olur. Bu dəyərin adı etibardır.

Etibar insanın ən qiymətli mənəvi sərvətidir. İnsanların sənə inanması, sözünə güvənməsi, arxanca xoş söz danışması illərlə formalaşır. Bir damla suyun daşı deşdiyi kimi, dürüstlük və səmimiyyət də zamanla etibar yaradır. Amma həmin etibarı itirmək üçün bəzən bir yanlış addım, bir yalan söz və ya bir xəyanət kifayət edir.

Cəmiyyətdə hörmət qazanmaq üçün savad da, bacarıq da, vəzifə də vacibdir. Ancaq bunların hamısından üstün olan etibardır. Çünki insanlar ilk növbədə etibar etdikləri şəxslərlə yol getmək, iş görmək və dostluq etmək istəyirlər. Etibarı olmayan insanın qazandığı uğurlar belə kövrək olur.

Bu gün dünyada bir çox münasibətlərin pozulmasının əsas səbəbi məhz etibarın itirilməsidir. Dostluqlar, ailələr, işgüzar əlaqələr və tərəfdaşlıqlar etibar üzərində qurulur. Bu təməl sarsıldıqda isə münasibətlərin ayaqda qalması çətinləşir.

Atalarımız boş yerə deməyiblər ki, "Adamın adı çıxınca, canı çıxsın." İnsan öz adını, nüfuzunu və etibarını qorumağı bacarmalıdır. Çünki etibar itəndə onunla birlikdə hörmət, inam, dostluq və bir çox imkanlar da itir.

Hər birimiz sözümüzə sahib çıxmalı, verdiyimiz vədlərə əməl etməli, dürüstlüyü həyat prinsipimizə çevirməliyik. Çünki insanı böyük edən yalnız əldə etdikləri deyil, həm də qazandığı etibardır.

Unutmayaq ki, ən böyük itki maddi deyil, mənəvi itkidir. O mənəvi itkinin ən ağırı isə etibarın itirilməsidir. Çünki etibar itəndə zaman özü ilə çox şeyi aparır.

Baş redaktor :
Vəli Əliyev