Hər bir insan daxilində gizli bir aləmi daşıyır — arzular, məqsədlər, istedadlar və dəyərlər toplusu. Ancaq bu aləmin əsl siması, yalnız sözlərlə deyil, insanın gördüyü işlərlə aydın görünür. İş – insanın cövhəridir, çünki o, quru niyyətləri deyil, gerçək bacarığı və iradəni üzə çıxarır.

Bir insanın kim olduğunu bilmək üçün onun nə dediyinə yox, necə işlədiyinə, məsuliyyətinə, əzminə və əməyinə baxmaq kifayətdir. Ədalətli işləyən biri, dürüst xarakterə sahib olduğunu; zəhmətdən çəkinməyən biri isə iradəli və möhkəm ruhlu olduğunu göstərir. Əməksiz həyat, forması olan, lakin məzmunu olmayan bir kitab kimidir – sətirlər var, amma mənası yoxdur.

İnsan gördüyü işlə həm özünü cəmiyyətə tanıdır, həm də daxili dünyasını formalaşdırır. İş yalnız maddi qazanc üçün deyil, həm də şəxsiyyətin cilalanması üçün bir vasitədir. Daş belə cilalanmadan əvvəl kobud və dəyərsiz görünə bilər, amma emal olunduqca parıldayır. İnsan da elədir — zəhmət və iş onun qəlbindəki cövhəri üzə çıxarır.

Bu səbəbdən boş zaman, tənbəllik və məqsədsizlik, insanın cövhərini paslandırar, onu solğunlaşdırar. Halbuki zəhmət, məsuliyyət və səbir, bu cövhəri nura çevirər.
Vəli Əliyev