İnsan ömrü günlərlə deyil, insanlarla ölçülür. Çünki hər görüş, hər söhbət, hər münasibət ruhumuzda bir iz buraxır. Biz fərqinə varmasaq da, hər gün vaxtımızı bölüşdüyümüz insanlar düşüncəmizə, xarakterimizə, hisslərimizə və taleyimizə təsir edirlər. Elə buna görə də deyirlər: vaxtını kimlə bölüşürsənsə, ruhun da yavaş-yavaş ona bənzəməyə başlayır.

Həyat bir məktəbdir. Bu məktəbdə müəllimlər təkcə kitablarda deyil, həm də ətrafımızdakı insanlardır. Bəziləri bizə sevgini öyrədir, bəziləri səbir və mərhəməti, bəziləri isə xəyanətin, nankorluğun və etibarsızlığın necə acı olduğunu göstərir. Ən böyük müdriklik isə kimlə yol getməli, kimdən isə uzaq durmalı olduğunu vaxtında dərk etməkdir.

İnsan bəzən başqalarını itirməkdən qorxduğu üçün özünü itirir. Hamını razı salmağa çalışır, hamının yükünü çiyninə götürür, amma bir gün dönüb baxanda görür ki, yorulan da, sınan da, unudulan da elə özü olub. Halbuki Allah insana ləyaqət, şərəf və qürur bəxş edib. Bu nemətləri qorumaq insanın həm özünə, həm də Yaradanına qarşı məsuliyyətidir.

Müqəddəs dinimiz insanın dost seçiminə xüsusi diqqət yetirməyi tövsiyə edir. Yaxşı insan qaranlıq yolda işıq kimidir, pis insan isə işıqlı yolu belə qaranlığa çevirə bilər. Saleh insanların məclisində olmaq qəlbi saflaşdırır, mənəviyyatı zənginləşdirir, ümidləri böyüdür. Mənfi düşüncəli insanların yanında olmaq isə insanın ruhunu yorur, inamını zəiflədir və həyat sevincini əlindən alır.

Bu gün cəmiyyətimizdə bir çox insanlar "ayıb olar", "nə deyərlər" düşüncəsi ilə öz rahatlığını qurban verir. Halbuki insanın özünü qoruması, mənfi münasibətlərə "yox" deməsi, sərhədlər müəyyən etməsi nə təkəbbürdür, nə də eqoizm. Bu, özünə hörmətin, daxili gücün və sağlam şəxsiyyətin göstəricisidir.

Sərhəd qoymaq kin saxlamaq deyil. Sərhəd qoymaq qəlbini qorumaqdır. Çünki qırılmış qəlbin səsi eşidilməsə də, ağrısı ömür boyu hiss olunur. Hər kəs həyatında onu anlayan, sevən, dəyər verən, uğuruna sevinən, səhvini isə sevgi ilə düzəltməyə çalışan insanlara yer verməlidir. Belə insanlar Allahın bəndəyə bəxş etdiyi ən qiymətli nemətlərdəndir.

Bu gün ailələrimizin möhkəmliyi, cəmiyyətimizin sağlamlığı və dövlətimizin gələcəyi də insanların bir-birinə olan münasibətindən asılıdır. Hörmət olan yerdə etibar var, etibar olan yerdə birlik var, birlik olan yerdə isə güclü millət formalaşır.

Gəlin, həyatımıza kimləri qəbul etdiyimiz barədə daha çox düşünək. Çünki hər kəs qapımızı döyə bilər, amma hər kəs qəlbimizə daxil olmağa layiq deyil. Ruhumuzu işıqlandıran insanları qoruyaq, bizi qaranlığa aparan münasibətlərdən isə uzaqlaşaq.

Unutmayaq ki, insanın ən böyük zənginliyi bank hesabı deyil, vicdanının rahatlığı, qəlbinin təmizliyi və ətrafındakı xeyirxah insanlardır. Doğru insanlar insanın ömrünü uzadır, yanlış insanlar isə ruhunu qocaldır.

Ruhunu kimə əmanət etdiyinə diqqət et. Çünki həyatını dəyişən çox vaxt hadisələr deyil, insanlardır.

Vəli Əliyev

"Milli Mənəviyyat"
müstəqil, beynəlxalq qəzetinin
Baş redaktoru