Bu gün İslam aləminin müqəddəs günlərindən biri olan Aşura günüdür. Aşura təkcə bir matəm günü deyil, eyni zamanda haqqın, ədalətin, mərdliyin və mənəvi dəyərlərin təntənəsini özündə əks etdirən böyük bir tarixi hadisənin yad edildiyi gündür.

Kərbəla çölündə Həzrət İmam Hüseynin və onun silahdaşlarının göstərdiyi misilsiz qəhrəmanlıq əsrlər keçsə də, insanlara haqq uğrunda mübarizənin ən ali nümunəsini təqdim edir. Onlar sayca az olsalar da, zülmə boyun əymədilər, haqqın və ədalətin yanında dayanaraq tarixə əbədi şərəf səhifəsi yazdılar.

Azərbaycan xalqının Ümummilli Lideri Heydər Əliyev də Məhərrəmlik və Aşura hadisəsinin mənəvi əhəmiyyətini yüksək qiymətləndirərək qeyd edirdi ki, bu günlər insanları xeyirxahlığa, mərhəmətə, səbir və dözümlülüyə çağırır. Ulu Öndər vurğulayırdı ki, İmam Hüseynin şəhadəti insanlara həqiqət uğrunda mübarizə aparmağın, mənəvi saflığı qorumağın vacibliyini öyrədən böyük bir məktəbdir.

Aşura günü bizə xatırladır ki, insan həyatda hər zaman vicdanın, ədalətin və doğruluğun tərəfində olmalıdır. Kərbəla hadisəsi yalnız dini deyil, həm də ümumbəşəri dəyərlərin təcəssümüdür. Bu hadisə insanlığa göstərdi ki, haqq yolunda verilən qurbanlar heç zaman unudulmur və mənəvi qələbə həmişə zülm üzərində üstün gəlir.

Bu gün ölkəmizin məscidlərində, ziyarətgahlarında və dini ocaqlarında insanlar bir araya gələrək Kərbəla şəhidlərinin xatirəsini ehtiramla yad edir, dualar edir, ehtiyacı olanlara yardım göstərirlər. Məhz bu xeyirxahlıq və həmrəylik ənənələri xalqımızın milli-mənəvi dəyərlərinə sadiqliyinin göstəricisidir.

Aşura günü hər birimiz üçün düşünmək, öz əməllərimizi dəyərləndirmək, cəmiyyətimizdə birlik, mərhəmət və ədalət prinsiplərinin möhkəmlənməsinə töhfə vermək baxımından mühüm əhəmiyyət daşıyır.

Allah bütün şəhidlərimizə rəhmət eləsin, xalqımıza birlik, dövlətimizə əmin-amanlıq və tərəqqi nəsib etsin.

Vəli Əliyev
Milli Mənəviyyat
müstəqil beynəlxalq qəzetinin
Baş redaktoru.